/p. 39/ Alex. – Quemadmodum es omnium bonarum
artium felicissimus alumnus, ita es earum facillimus
et liberalissimus administrator. I. C. – Missa
faciamus ista. Audesne hunc nostrum
ignem elementi nomenclatura donare? Alex. –
Minime. Est enim pauperrimus, pabulique
indigus, pro quo comparando evagatur,
quoque deficiente et ipse quoque deficit
et praemoritur. Elementum autem est opulentissimum
rerum principium. Praeterea ad generationis comitia
elementa accedunt, a quibus noster ignis
quam longissime abest, exterius enim evocat,
exsiccat, dividit ac qualitates ad summum
deducit; in generatione autem intus omnia
revocantur, humido opus est, ut partes in
unum conglobentur, miscentur qualitates mutuoque
se frangunt. I. C. – Quem igitur statuis ignem
elementum?
Alex. – Qui inter aërem et Lunae
coelum residet. I. C. – At cur oculis non se obijcit
nostris, si desuper est et corpus lucidum? Alex. –
Ob sui raritatem, quam ob causam nec aër
ipse videtur. I. C. – Nugae, nam sidera rara sunt, alioquin
solares radios non exciperent et ad Terram transmitterent,
prospiciuntur tamen, licet sint in maiori
distantia. Aër non videtur, non ob sui raritatem,
sed quia medium est ad videndum, quare extremum
esse nequit: insuper luce caret et colore,
quare nullam visui sui potest praebere
speciem. Ignis autem et propter lucem deberet
conspici in nocte et propter colorem in die.
Alex. – Si rarus non esset. I. C. – At enimvero
translucidus cum sit ignis, deberet emittere radios,